Значењето на Гоце Делчев

Гоце Делчев (1872-1903) е еден од најголемите револуционери во историјата на македонскиот народ, лидер na ТМОРО, подоцна преименувана во ВМРО.

Неговото мото беше: Подобро на бесилка, отколку да трпам предавници и шпиони!

Појавата на Гоце Делчев на македонската историска сцена е поврзана со неговата генијалност, со неговото грандиозно дело, кое претставува печат на времето во кое живееше и дејствуваше. Тој и неговата револуционерна генерација изникнаа од народот и успеаја да проникнат во сите негови желби, стремежи и интереси. Против стегите на тоа вековно ропство се изрази настојувањето за реализација на националната и социјална слобода, како единствен излез за да се стане целосен господар на сопствената земја. Гоцевата големина е во неговата саможртва за татковината која толку многу ја љубеше, во желбата за ослободување на народот за кого дишеше. Автономна македонска држава беже неговиот најголем сон кој го преточи во ореол на признание и почит. Неговото име стана поим, легенда, синоним за непокор и непрегор, вечен патоказ вткаен во свеста на македонските народни маси. Тоа допре и до последното катче на Македонија и стана симболот и знамето околу кое измачениот Македонец ги вплете сите свои надежи и стремежи за слободен и достоен човечки живот.
    Гоце и денес е жив во нашиот незаборав! 

                         

Мисли од Гоце Делчев

- Ослободувањето на Македонија се крие во внатрешното востание. Кој мисли поинаку, тој се лаже и себеси и другите.

-Ќе удри утринската зора и за нас...

-Браво, јуначе, дојди да ти ја стиснам раката и да те поздравам, такви и се потребни на мајка Македонија.

-                     --Светот го разбирам како поле за културен натпревар меѓу народите.

-                    --Не верувајте им на зборовите, верувајте им на делата!

-      --Јас не ги мразам Османлиите како народ. Јас војувам против османлиската тиранија како систем на владеење.

-                    --  Дали може да има друго место за еден Македонец освен Македонија?

-         --Морална револуција – револуција во умот, срцето и душата на еден ропски народ – тоа е најголемата задача!

ПЕСНИ ЗА ГОЦЕ ДЕЛЧЕВ

ХЕРОЈОТ

Ах, таа слобода,

толку блиску, а сепак далеку.

Замислувам битка,толку мрачна,

што ни Сонце не би ја осветлило,

а сепак постои тој,

оној што ќе не извлече од темнината.

Многу крв им ги испрска лицата

и секој од нив се покажа,

но сепак, тој од сите нив

најмногу се докажа.

Некој само омраза чувствува,

а некој со восхит го погледнува.

Но, таков е светот, суров и тажен,

секој кон различна страна се наведнува.

И дојде тој ден,

тој мрачен ден -

кога го достигна својот врв.

Еден нож, остар и сјаен,

се забоди во неговиот грб.

Тој падна, ја бакна земјата со своите усни

и рече дека живееше и ќе умре

за својата татковина.

И иако веќе мртов и студен,

непријателот ја почувствува

неговата жештина -

и секаде каде што имаше ладовина.

ПЛАМЕНОТ НА ПАТРИОТИЗМОТ

По патишта стрмни
Гоцева чета неуморно ита,
во срцата-љубов кон родната земја,
во очите пејзажи мили,
собираат сили -ќе одат в бој,
ќе бранат мајка-земја,
ќе осветлат народ свој.

На бојното поле
очи в очи со Турчинот жеден,
ни страв, ни трепет,
желба за одмазда-
македонско воскресение,
спас за идното поколение.

Пушка преку рамо,
чекори по земјата мила,
гази преку трупот на
противникот мртов,
трагата негова е вечна
и стапките блескаат свето,
за секој да знае и да рече:
-Гоце раните ги излече
и Македонија ја осветли
со пламенот на патриотизмот
што од срцето му блескаше.

ДЕЛЧЕВ – ЈУНАК МАКЕДОНСКИ

Еј, ти, јунаку Делчев,

бесмртен херој славен,

се бореше храбро, смело,

а ние го славиме твоето дело.

Во земјата македонска ти се роди,

твојата храброст во нас гори.

За слобода мила, за слобода света,

се бореше ти во зими и лета.

Против крвникот клет,

крена гордо глава.

Твојот херојски глас,

во села и градови

 ти донесе слава.

На чекор до слободата,

во крвав,тежок бој,

оловни зрна врнеа жешко,

куршумот го згасна животот твој.

ВО НЕЗАБОРАВ

Непријатели клети болка нанесоа вечна,

убавината на слободата ја зедоа.

А народот страден, за слобода гладен,

во борбата ја чекаше вистината.

Младоста не ја жалеа,

синџирот на ропството го раскинаа,

 светлина и непокор бараа,

темнината упорно ја параа.

Мрак народ заробува,

на борба мисла повикува,

измачен народ болен

да раскине синџир голем.

Младост нежна прежалена,

земја кон победа упатена.

Хероите животите не ги жалеја,

татковината на пиедесталот ја ставаа!

ГОЦЕ – ХЕРОЈ НАД ХЕРОИТЕ

Минато. Збор кој ме асоцира на храброст, борба, упорност. А таму е и тој, нашиот патрон, Гоце Делчев!

Непријател зазеде земја и народот го затвори во кафез, срце ќе испука од болка, солзи постојано се леат, болка в гради стега! Но, копнежот беше доволно голем, за Гоце да тргне против тие синџири ропски. Делчев – млад, живот не жалеше, татковината на пиедесталот секогаш ја ставаше.
          И денес, големината негова ја славиме. Со херојството негово се гордееме, со бесмртноста го прегрнуваме, со вечен спомен го даруваме!

ГОЦЕВАТА ХРАБРОСТ

        Гоце Делчев - верниот син, а и срцето на Македонија, многу голем човек... Но, не на изглед, туку во сопственото срце. Се одликувал со храброст, искреснот и верност. Иако толку млад, на 4 мај, во селото Баница, тој го даде својот живот за својата татковина. Тој се жртвуваше за слободата на својот народ.

        Покрај бесценетата храброст која ја поседувал, тој бил и голем мудрец.

Ова се некои од неговите мисли:

„Јас го разбирам светот како поле за културен натпревар меѓу народите.“

„Делото на ослободувањето на еден народ, е пред сè негово сопствено дело, на неговите сопствени раце."

ГОЦЕ ДЕЛЧЕВ - ХЕРОЈОТ КОЈ ВЕРУВАШЕ

Херои - така се нарекуваат само најхрабрите луѓе. Оние кои одат на сè или ништо. Оние кои би направиле сè, само за да го постигнат тоа што го сакаат.

Гоце Делчев - еден од хероите! Се борел за слобода на нашата земја. Еден од оние кои придонеле ние денес да уживаме во сонцето на слободата.

 Гоце поседувал дел од најважните работи што може еден човек да ги има: упорност, храброст, желба... Знаете ли како е да сакате нешто, а да бидете спречени? Тоа е она за чие остварување е потребна упорност. Повеќето луѓе кога ќе наидат на оваа пречка, се откажуваат од својата цел и останува само да мечтаат за неа. Но, Гоце не бил како нив! Само со напорна работа може да се постигне тоа што се сака. Никогаш не треба да се откажуваме. Секогаш кога ќе помислиме да се откажеме, да размислиме зошто сме започнале. Тоа е поттик за храбри дела!
        Еднаш Гоце рекол: ,,Труд и постојаност, тоа е силата со чија помош човек станува најголем при секоја иницијатива”. Дали знаете на што сака да нè поттикне со оваа мисла? Знаете ли што сака да каже со ова? Да бидеме упорни, бидејќи со работа се постигнува сè! 

СМРТТА НА ГОЦЕ

(ПРЕКУ ЗБОРОВИТЕ НА

ДИМО ХАЏИ ДИМОВ)

"Речиси цел ден и цела ноќ, ние скриени го гледавме водач, легнат како жив, со глава наведната кон земјата. Тој небаре плачеше над својата судбина, над судбината на сите паднати како него, над судбината на цела Македонија. И кога настана часот и за нас да умираме или да излеземе од огнениот обрач, ние во мислите се простивме за момент со него и го оставивме да плаче. За нас што го оставивме, тој и сега е таму на истото место, во истата положба, тој и денес плаче над своето кобно место каде што го оставивме. Петнаесет часа Турците не смееја да им се доближат на нашите убиени. Петнаесет часа ние го гледавме мртвиот Гоце, наведнат небаре над гробот на Македонија. И петнаесет часа ни се кинеа срцата... Зашто, осиромашуваше цел еден народ."